საქართველოში ჩამოსულ უცხოელ ოჯახს ლტოლვილის სტატუსი მიენიჭა
ჩვენს იურიდიულ ფირმას მიმართა დსთ-ის ერთ-ერთი სახელმწიფოდან საქართველოში ჩამოსულმა ოჯახმა, რომელიც საერთაშორისო დაცვას ითხოვდა. ოჯახის წევრების განცხადებით, წარმოშობის ქვეყანაში ისინი პირთა ჯგუფის მხრიდან სისტემატურ უკანონო დევნას განიცდიდნენ, რასაც საკუთარ პოლიტიკურ შეხედულებებს უკავშირებდნენ.
დევნა გამოიხატებოდა ფიზიკური ანგარიშსწორების, ოჯახის საკუთრებაში არსებული ქონების განადგურებისა და სხვა სახის მუქარებში, რაც მათი უსაფრთხოებისთვის რეალურ საფრთხეს ქმნიდა. აღნიშნული გარემოებები გამყარებული იყო კონკრეტული ფაქტებითა და მასალებით, რომლებიც ადასტურებდა ოჯახის შიშის საფუძვლიანობას წარმოშობის ქვეყანაში დაბრუნების შემთხვევაში დევნის შესაძლო გაგრძელებასთან დაკავშირებით.
ადვოკატ ბექა ნემსიწვერიძისთვის მიმართვის შემდეგ შემუშავდა საქართველოში საერთაშორისო დაცვის მოპოვების სამართლებრივი სტრატეგია. ადვოკატმა დეტალურად შეისწავლა საქმის გარემოებები, გააანალიზა წარმოდგენილი ინფორმაცია და მტკიცებულებები, მოამზადა საჭირო დოკუმენტები და შეადგინა სამართლებრივად დასაბუთებული განცხადება ლტოლვილის სტატუსის მინიჭების მოთხოვნით.
საქართველოს უფლებამოსილ მიგრაციულ ორგანოში წარდგენილ განცხადებაში დეტალურად იქნა აღწერილი წარმოშობის ქვეყანაში განხორციელებული დევნის გარემოებები, მისი სავარაუდო პოლიტიკური მოტივები, მუქარის ხასიათი და ოჯახის დაბრუნებასთან დაკავშირებული საფრთხეები.
განცხადების განხილვის შედეგად საქართველოს უფლებამოსილმა ორგანომ დააკმაყოფილა ჩვენი მოთხოვნა და ოჯახის წევრებს ლტოლვილის სტატუსი მიანიჭა.
შედეგად, გაწეული იურიდიული დახმარების საფუძველზე ოჯახმა საქართველოში საერთაშორისო დაცვა და მინიჭებული სტატუსის შესაბამისად კანონიერად ცხოვრების უფლება მოიპოვა.
